城中鏡：惜福助尼國
雖然香港喺最新公布嘅全球幸福指數排名好低，但無可否認，香港人確實好幸福。香港青年服務領袖獎勵計劃（獎勵計劃）創辦人Fonia黃仰芳同聯席創辦人Moray林月萍，早前就帶領一班香港青年到尼泊爾探訪基層學生同孤兒，點知結束探訪回港後，尼泊爾即發生造成約八千人死亡嘅大地震。為咗籌款幫助尼泊爾災民，日前佢哋舉行一場分享晚宴，由兩名親身經歷尼國地震嘅港青細訴見聞。
林月萍（左二）同黃仰芳（右二）搵周廣傳（左一）及趙浩霖（右一）分享尼泊爾地震經歷。
余秋偉（左）睇好珠寶網購生意，旁為海外潮人企業家協會會董溫秀微。
潮州商會會董蔡敏思（左）同金紫荊女企業家協會副主席李凱琪都去捧場。
舊年獎勵計劃喺十三個制服團體中，評選出十三位青年服務領袖獎得主，今年四月Fonia同Moray就帶領一班後生仔去尼泊爾展開服務之旅。Fonia話佢哋返港後，尼國即發生地震，但有兩位港青周廣傳及趙浩霖就留低多幾日，點知就目睹地震摧毀家園嘅一幕。
余秋偉搞珠寶網購夠潮
新世界集團創辦人鄭裕彤次子兼周大福慈善基金理事長鄭家成都現身分享會，佢話香港人好幸福，至少有瓦遮頭，尼泊爾災民就冇咁幸運，所以呼籲大家慷慨解囊。
佢又盛讚獎勵計劃挑選出有心嘅青年領袖喺本港及海外做服務，十分有意義，所以佢會再支持第二屆計劃。
身兼香港潮州商會會董嘅晉豪洋行董事余秋偉都有到場，潮州人做生意好叻，佢最近就睇中高質素嘅珠寶首飾市場，但佢唔係行傳統零售路線，而係用結合展銷零售及網絡銷售方式，相信可以搵到商機。
