政壇：搞搞政：WhatsApp對話外洩 建制真人露相

喺對話內容可以睇到建仔內部嘅真正「當家」，仍然係前主席譚耀宗同葉國謙，兩人不時發號施令，遙控建制派集體行動；而聲稱中立嘅立法會主席曾鈺成更屢次出手，可見佢嘅監察同指揮角色不容忽視。令人刮目相看嘅，反而係鍾樹根同陳鑑林，前者平時經常講錯嘢，後者悶聲發大財，但兩人今次都有做智囊獻計，特別係樹根喺對話過程中，有着冷靜嘅分析，甚至質疑葉國謙嘅決定。

僅一人發言 富貴黨疏離

至於其他建仔中人呢？蔣麗芸分別講「黃毓民到」、「黃碧雲在前廳」、「宴會廳無泛民」幾句，似乎佢專責做狗仔隊，睇實泛民一舉一動。反而做咗十幾年議員嘅黃定光，經常在群組內「每事問」，先問發言時間幾多分鐘，之後又問下一步有乜行動，好似唔知發生緊乜事咁。最令人失望嘅可以話係建仔主席李慧琼，咁重要關頭，竟然一句聲都無出過，變咗做「李慧零」，如果佢錫身到咁，真係可有可無。

今次亦揭露旅遊界嘅姚思榮亦係一名智將，平時粒聲唔出嘅佢，竟然識得建議將表決時間拖至第二日朝早，又識叫大家預留發言人數，等泛民提出中止待續議案後，建制派可以繼續控制結束時間。至於工聯會主要擔當啦啦隊打氣角色，例如黃國健同陳婉嫻都係叫大家冷靜、留力，而好少留言嘅麥美娟，就第一時間安慰主動道歉嘅保險界陳健波，算有情有義。

外界以為富貴黨無出過聲，咁就錯晒嘞，據我哋統計，當日表決前後嘅「甩轆六小時」，其實該黨有一位議員發言，就係航運交通界易志明，但佢只係出過一句「小弟可發言」，證明該黨同建制派關係幾咁疏離。此外，發言最短嘅建制派議員，係工業界梁君彥，佢喺朝早九點幾彈出咗一個「忍」字，到底叫大家忍咩呢？到最後，當然不得不提地產及建造界議員石禮謙嗰句經典嘅「團結日係我哋嘅力量」，連佢都話自己寫錯，種種嘢加埋，難怪有港區人大鬧建制派議員係沒承擔嘅垃圾喇！