政壇：泛民呻窮 辭職公投冇影
白鴿黨嘅立法會「超級區議員」「AV仁」何俊仁今年一月宣布會喺政改方案否決之後，發動辭職變相公投，政改上周已經否決咗，連退出公文袋嘅湯家驊都已經辭咗立會議員職務，但AV仁仍然遲遲未有行動，預咗佢想縮沙唔玩。泛民主派尋日又再召開多方平台會議，白鴿黨單仲偕喺會後話，團體對於搞唔搞公投，仍有原則性分歧，要拖到七月三日先開最後一次會，做最終決定。
何俊仁
據知會上社民連同學民思潮堅持要搞辭職公投，但各團體都大呻唔夠錢，學聯就一早講咗負擔唔到。而公文袋就因為湯家驊辭職，令問題變得複雜，如果該黨要參加新界東補選，資金上會有好大困難，而其他黨亦唔見得多錢，睇嚟今次公投都係「煲無米粥」收場。
除咗錢，學界亦都對於公投題目好有意見，之前明明講好用重啟政改五部曲做公投題目，但有學生團體要求改用修改《基本法》做題目，單仲偕澄清已排除呢個可能性。梗係啦，之前白鴿黨阿姐劉慧卿已講明唔支持修改《基本法》嘛，況且白鴿黨搞辭職公投，點到學界話事呢？
