政壇：李嘉誠：同理心最佳投資
汕頭大學（汕大）畢業典禮尋日喺校內新建嘅體育館舉行，有約六千人出席，李嘉誠基金會創辦人、汕頭大學校董會名譽主席李嘉誠更親自出席致辭。李嘉誠話，同理心有無可量度嘅威力，係世界上最值得投資嘅「儲值貨幣」，又話世人要求成功者交出嘅成績表，唔只要對經濟有所掌握，仲要對環境保護有所承擔，對人類生活有所貢獻，呢「三重底線」概念已經係最基本嘅要求。
李嘉誠話只有具備同理心嘅人，先知自己係一個能夠改善今天、貢獻明天、拒絕僵化的求成者。
李嘉誠又話，具備同理心嘅儲備，先知自己係一個「求存者」定「求成者」，而兩者嘅分別，前者眼中一切都係「謎」，但後者即使置身於熙熙攘攘嘅世態中，都依然懂得解碼嘅方法。而「求成者」仲會以「仁能善斷」、「仁能善擇」定義自己一生。佢叫大家要將呢種態度元素好似編寫智能系統內核咁，內置喺人生當中，不斷升級、不斷優化，相信各位同學一定會選擇做一個「求成者」，對同學充滿信心。
