政壇：遇學生請願 陳新滋搶信
喺舊年佔領行動期間做大台咪手嘅社工邵家臻，早前獲選連任浸會大學青年研究實踐中心副主任，但學校被要求重新考慮，質疑佢有機會影響中心獨立性。雖然浸大最後都任命咗邵家臻，但一班學生同社工，尋日仍趁浸大召開教務議會會議時，向校長陳新滋請願，但過程就唔多順利。
陳新滋接學生請願信無耐性，係咁扯走封信。
當陳新滋去到會議室，手持請願信嘅社工系校友代表就要求佢解釋，點解要求邵家臻重新考慮任命，陳竟然伸手搶信，仲話「你畀咗封信我先，你係咪畀信我先」，但代表即時閃開咗。
搶唔到信，陳新滋惟有回應學生提問，重申浸大一直捍衞學術自主，又再一次催學生盡快交信，話「唔好揸住封信唔畀我！」直至陳新滋想轉身走，學生同校友代表終於將信交到陳新滋手上，陳最後「你係畀我就畀啦」，更加多次大力扯走封信，之後急急腳去開會。
睇嚟陳新滋對接請願信真係唔多在行，但唔緊要，事關佢七月就退休，應該無機會再接信，我哋等到九月，就可以睇吓新任校長錢大康點樣去接信喇。
