政壇：食花生睇「好戲」 鍾國斌生痱滋
就因為一場政改甩轆騷，造就富貴黨仝人由建制派「壞孩子」洗底，就連中聯辦前晚召見建制派飲夜茶，該黨亦自覺好光榮，原來壞孩子間唔中盡本分投票，都可以好似立咗大功咁。該黨主席Felix鍾國斌仲話，當晚夜茶除咗點心，仲有花生食，但就好後悔夜茶食花生，食到第二日生痱滋喎，真係自己攞嚟。該黨成晚「食住花生睇好戲」，事後仲咁風騷，真係唔知攞景定贈興？
設計圖片及對白
連日風波由WhatsApp嘅絕密對話曝光而起，泛民主派即刻轉用另一通訊程式Telegram避避風頭。不過，Felix話建制派冇因為洩密而轉用其他應用程式溝通，話始終四十幾個議員，逐個講好困難，所以會繼續用「肇事」群組溝通，但相信短期內，大家說話會小心好多，因為仲未捉到「鬼」喎。
CY倡雙方會面恒常化
講番富貴黨，有四名議員尋日應邀到特首辦同特首CY梁振英會面，但會面僅約半小時就閃電結束，唔通壞孩子又同人哋不歡而散？Felix會後話其實氣氛唔錯，形容係雙方建立友好關係嘅好開始，仲引述CY建議雙方會面應該恒常化，個幾月應該見一次面，富貴黨都認同呢個安排。至於關係可唔可以長久，暫時仍然好似會面時唯一提供嘅水咁，君子之交淡如水囉。
至於今次會面，雙方會上主要討論經濟議題，CY仲準備咗該黨舊年提交嘅施政報告建議，一齊討論。佢哋建議加快引入海外畢業同海外註冊專科醫生來港執業、善用本港工業園剩餘用地，以吸納工業界回流香港，改善「香港製造」品牌等。
