安居樂業成空 幸福遙不可及

民調機構蓋洛普尋日公布全球幸福指數，香港喺一百四十五個國家及地區中排名一百二十，幾乎包尾。咁都未算，喺生活目標、社交、財務、社區歸屬感同健康五個範疇裏面，港人喺人生目標同健康評分排全球尾六，僅僅高過阿富汗同巴勒斯坦等戰亂頻仍嘅落後地區，都咪話唔得人驚。

講起嚟都算丟架，香港假假哋都叫做國際都會，港府更加肥到着唔到襪，窮得只剩下錢，港人居然愈來愈唔快樂，愈來愈唔幸福，簡直匪夷所思。不過又難怪嘅，財富分配嚴重不公，上升階梯斷裂，跨代貧窮成為常態，基層市民點會有好日子過吖。衣食住行樣樣難，打工仔人工加幅永遠追唔上通脹，生活質素好似滾水淥豬腸咁兩頭縮，仲講生活目標喎，咪玩啦！

至於市民健康情況差，其實亦唔難理解。打工仔生活壓力超大，搵兩餐都做到踢晒腳，根本冇時間運動同休息。再講吖，香港空氣污染嚴重，市民吸埋吸埋唔少廢氣，身體唔差至奇喇。香港近年宜居排名跌跌不休，其中一個主要原因，咪就係空氣質素差，居住環境惡劣囉。

講真，市民嘅願望其實好卑微，只要安居樂業就夠嘅嘞。可惜吖，樓價長升長有，租金水漲船高，公營房屋又供不應求，搞到連劏房都爭崩頭，市民想有個安樂窩，簡直係遙不可及嘅夢想。無恒產者無恒心，大批無殼蝸牛望樓興嘆，年輕人冇前途冇希望，又點會幸福呢？

今時今日嘅香港，安居樂業固然難過登天，連圖個耳根清淨都唔容易。大家有眼睇，成個社會爭拗多多，政客為反對而反對，民生經濟一事無成，仲有嗰班借本土為名搞搞震嘅激進分子，一時佔領，一時光復，一時驅蝗，一時鳩嗚，仲要整埋炸彈添，好似唔整死香港唔安樂咁款。最慘係畀佢哋搞一搞，旅客過門不入，搞到旅遊、零售等行業雞毛鴨血。所以話啫，政治唔可以當飯食，真係冇講錯o架。

其實計太一叮話齋，港人到底幸唔幸福，使乜做民意調查吖。家陣稍有條件嘅家庭，唔係舉家移民就係送仔女去外國讀書，個個爭住跳船，香港點會有運行吖，叮！