東驥基金管理尋日舉行酒會慶祝成立二十五周年，場面熱鬧，董事總經理Paul龐寶林話，咁多年嚟見證住有客戶由後生到依家退休，近幾年公司一大挑戰就係愈來愈多父母贖回基金，用嚟幫仔女畀首期。咁唔知佢又會唔會幫打入咗港姐十六強嘅寶貝女Ada龐卓欣畀首期呢？佢就笑笑話自己已有多個物業，唔需要啦！咁講法，Ada第二日都冇上車煩惱。

多位財金界人士恭賀龐寶林（中），但佢寶貝女就冇出現。

尋日多位財金界人士好似智易東方證券行政總裁藺常念、君陽證券行政總裁鄧聲興都有到場恭賀阿Paul，但Ada就冇出現。阿Paul話寶貝女依家忙住參加港姐訓練，唔得閒嚟喎！

第一手消息請下載on.cc東網iPhone/iPad/Android/Windows Phone Apps