仁濟醫院顧問局早前舉行周年大會,選出王氏國際主席Ben王忠秣擔任顧問局主席,下月起生效。喺咁開心嘅時刻,一班顧問局同董事局成員齊齊食晚飯慶祝一番,席間眾人情緒好高漲,細問之下,原來某大地產商打算向仁濟捐贈位於新界八鄉嘅二萬呎農地,依家雙方仲磋商緊細節,難怪當晚個個笑晒喇!

王忠秣(右一)升任顧問局主席,林煒珊(右二起)、總理鄭李華熙同王賢訊都戥佢開心。

仁濟醫院前主席蘇陳偉香、羅嘉穗(後左及右)、錢曼娟(前右)同嚴徐玉珊感情十分要好。

仁濟醫院總理吳國榮笑言做善事無蝕底,捐得愈多賺得愈多喎。

記得前年博愛醫院獲恒基地產捐出價值逾億元嘅農地,用嚟興建全亞洲最大嘅護理安老院,估唔到仁濟醫院主席Vanessa林煒珊腳頭咁好,亦獲地產商伸出援手。Vanessa謙稱唔係自己嘅功勞,查實係幾代仁濟成員努力嘅成果,顯示仁濟愈來愈受社會肯定咁話。

突然有塊靚地「從天而降」,用嚟做乜好呢?仁濟醫院行政總裁黃偉健就話,如果捐地計劃成事,可以用嚟興建護理安老院或青年宿舍,但最終都要睇吓政府點審批改變土地用途。

「積善之家」助新移民

當晚到場嘅好多都係一家人,例如做過仁濟醫院主席嘅Vanessa爸爸林建名、阿Ben嘅兒子仁濟醫院副主席王賢訊、副主席嚴徐玉珊同老公、前主席嚴玉麟,仲有「針織大王」羅定邦女兒羅嘉穗同弟婦堡獅龍執董錢曼娟,名副其實係「積善之家」。羅嘉穗話家族旗下嘅宏施慈善基金繼上個月喺深水埗開設社區中心,為新來港家庭提供支援後,快將喺葵涌開多一間,事關社會有好大需求,早做好過遲做喎。

第一手消息請下載on.cc東網iPhone/iPad/Android/Windows Phone Apps