水務署早前喺慈雲山一帶更換水管，部分屋邨需要暫停供水配合，但有居民喺供水恢復後，發現食水含有黑色沉澱物，好黏手，懷疑係瀝青，仲形容食水「又濁又臭」。有居民洗衫之後發現衣服上有黑色微粒，要用膠紙先可以清除，有街坊仲不惜上山擔水煮飯同飲用添；又有區議員要求水務署喺查明原因前暫停更換工程。署長林天星只顧水管工程，漠視居民健康，累街坊飲黑心水，即係攞人命較飛，真係點止兜巴星咁簡單！
