政壇：搞搞政：鄉紳推侯志強「入地獄」

如果建仔要派人出戰嘅話，唔係陳勇就係劉國勳，兩個都係北區區議員，又同時係建仔嘅人，即係鄉議局死敵，搞到今日鄉議局開執委會，多個鄉紳都推舉侯志強參選，仲話「佢唔入地獄，邊個入地獄」，叫「阿強，上！」又話行軍遣將，最緊要係時機喎；又叫副主席張學明做中間人，嗌建仔幫鄉事派抬番一次轎添。

侯志強話衷心多謝各位支持，希望凝聚新界人力量，唔好成日幫人抬轎咁無出色，又話無論邊個出選都會全力以赴。講完全場拍手，真係唔講仲以為佢已經當選咗。

小強稱發叔心情平復

啱啱「登基」嘅鄉議局主席劉業強都話，鄉議局派人參選係好事，又話喺依家嘅政治環境下，議會議席主宰一切，如果鄉事派喺未來一屆立會攞唔到任何議席，會令成個新界鄉事組織陷入被動，呼籲各人為選舉做好準備。不過，參加補選單嘢仲要交畀相關委員會處理，係咪派人參選，就未作最後拍板嘅。

另外，近日發叔不斷被傳患咗重病，所以無就政改方案投票，甚至話佢會辭去立會議席。劉業強就話冇呢件事，發叔之前係有少少感冒，有去過醫院做身體檢查，但依家身體已經好轉緊，又話雖發生「甩轆」事件，但爸爸身經百戰，依家睇落心情已經無受影響喇，雖然少出嚟，但係日日都有朋友探佢喎！