政壇：陳智思狂操決戰林書豪
行政會議成員Bernard陳智思患有先天性心血管病，但亦係政界少有嘅運動健將。本周六佢將同美籍華人NBA球星林書豪一較高下，決戰在即，十幾年無打籃球嘅Bernard密密操Fit，佢謙稱唔想比賽當日出醜，無端成為主角喎。不過，有林書豪喺度，佢都好難做到主角喇！
林書豪（資料圖片）
陳智思勤練射籃備戰，期待與林書豪決一高下。（受訪者提供圖片）
同世界級高手過招，Bernard心情緊張，兒子安慰話，無人期望佢打得好過林書豪。但Bernard認為比賽要有體育精神，輸贏好閒，最緊要唔好打得太差，至少比賽當日射籃時，個波起碼要掂到籃框，唔好Air Ball（大針）喎，即係個波乜都掂唔到咁解。查實Bernard每日有健身，基本體能無大問題，但佢份人相當認真，比賽前一日都租咗場練多一次，相當投入。
被問到擔唔擔心會喺比賽「甩轆」，Bernard笑言希望自己唔好出醜：「今次活動，我唔係主角，主角係班年輕人同活動本身，最怕係本來自己並非件事嘅主角，最終因為打得核突，無端成為主角。」
