建制派喺立法會上周表決政改方案時發生世紀「大甩轆」事件，而表決當日嘅WhatsApp群組對話內容，仲揭露建制派溝通混亂嘅情況，惹來全城熱議。當日有喺港區全國人大代表WhatsApp群組留言嘅積金局主席黃友嘉，尋日出席活動時話仲未睇事件嘅相關報道。不過，相信佢唔使睇都知發生緊乜事喇！佢話依家即時通訊群組私隱程度有限，何況建制派群組有成幾十人咁多，仲難知係邊個同幾時洩漏消息。

黃友嘉話建制派群組咁多人，洩漏消息好難避免。

咁佢會唔會因為今次事件而變得好小心或驚咗唔再用WhatsApp？佢就話呢啲群組始終都有佢哋嘅作用，如果唔用咪轉用Wechat囉，但如果群組入面人多，始終都好難保密，佢話會預咗講嘢要小心啲。對於有泛民主派議員批評立會主席曾鈺成加入建制派群組討論，違反中立原則，佢就話唔評論喇！至於政改方案因建制派離場而被大比數否決，佢就認為係建制派嘅失誤，但邊個要負責佢就唔回應。

第一手消息請下載on.cc東網iPhone/iPad/Android/Windows Phone Apps