政壇：今年七一不再熱「鬧」
下個星期三就係「七一」，隨着政改塵埃落定，無論泛民、建制，兩大陣營都要學律政司司長袁國強「休養生息」，舊年七一各自搞大龍鳳嘅場面睇怕唔會重現。統籌建制各黨派嘅香港各界慶典委員會有別於舊年同民陣打對台，今年絕迹民陣遊行路線，兼罕有移師到尖沙咀文化中心廣場搞七一活動，只容納到二千人，同民陣隔住成個維港，唔驚出亂子喇！
設計圖片及對白
慶祝也縮水 唔關甩轆事
今年「縮水版」七一活動，除咗文化中心廣場嘅啟動禮，港島區重頭戲都刻意避開民陣遊行地點，改到柴灣公園舉行，九龍、新界區就選址旺角同沙田。往年慶祝活動只係曇花一現，委員會希望今年唔再靠敲鑼打鼓、興高采烈咁堆人頭，而係深入細節、民心，希望市民起碼開心兩個月喎。唔通愛國活動都要學泛民咁「遍地開花」？
雖然話深入細節，但全港大小活動加埋都有一百八十場，料有三十萬人參與，聽落去規模唔比去年細，但至今只係聽聞中華總商會再搞商戶優惠，唔夠去年有逾千間商戶參與咁熱鬧，唔通慶祝七一都受政改表決甩轆而被迫閂水喉？委員會就話七一活動同政改冇關喎。
另一邊廂，民陣宣布行政署拒絕七一遊行以「公民廣場」政府總部東翼前地做終點，但仲係以十萬人為目標。不過，睇番佢哋上星期連日嘅滾動式集會，加埋只得幾千人，七一要達標認真有難度；加上遊行以「修改《基本法》」為副題，但包括民主黨在內嘅泛民政團都表明有異議，要谷到十萬可能要靠場外點人至得喇！咁即係話，泛民都唔係點睇民陣召集人陳倩瑩台戲嘞！
