宣淫慣犯獲放生 司法亂象知多少
華盛頓細個斬斷櫻桃樹，坦承過錯，最終獲父親原諒。但大家有冇諗過，如果小華盛頓斬樹斬到上晒癮，斬吓斬吓斬咗一百幾十棵，你估華爸爸仲會唔會放過佢吖嗱？
太一叮之所以講起呢段古，皆因壹淫媒宣淫販賤又斷正嘞。佢哋旗下刊物《忽然1周》今年一月一篇報道，被淫褻物品審裁處裁定發放三項不雅物品罪，即無依法例以不透明封套密封刊物，無喺封面或封底註明出版人名稱、地址、電話同無警告字句，違反《淫褻及不雅物品管制條例》。原來今次已經係壹淫媒第一百二十多次干犯同類罪行，案底仲厚過電話簿，問你點頂！
好嘞，既然有人係慣犯，照計應該被罰到傾家蕩產至係。講你都唔信，淨係判罰九千元了事，平均每宗罪罰款三千蚊咁大把。唔係啩，區區幾千銀，莫講話冇阻嚇力，直頭等於鼓勵人犯法。難聽啲講句，壹淫媒因為呢單畸士又有得見報，雖然係罵名，話晒都叫免費宣傳，幾千蚊「廣告費」直頭物超所值啦，吓話。
根據現行淫褻條例，再犯者最高罰款一百萬元及監禁一年，但事實啱啱相反，咁多年嚟，壹淫媒宣淫販賤次次都被放生，罰款多則幾萬，少則數千，從來冇人踎過一日監，有法等於無法。唔怪得港府早排檢討淫褻條例，將最高罰款及監禁分別增加至二百萬元及兩年，外界反應冷淡喇。鬼咩，有法不依，執法不嚴，罰則再高都係紙上文章啫。
最離譜嘅係，當局包庇淫媒不特止，仲大玩親疏有別，打壓異己。最經典例子，莫過於女星Kelly Brook嘅同一輯照片，登喺爛果報被評為一級非不雅，登喺東方報業集團就被評為二級不雅，登喺香港有售嘅外國雜誌連送檢都慳番，一法三制，話唔係有心針對，三歲細路都唔信喇。
一句講晒，今時今日香港，愛國愛港無前途，反中亂港有運行，司法護淫已經係常態嘞，市民早已見怪不怪。大家有眼睇，一場佔領之亂，搞到香港幾乎萬劫不復咁滯，壹淫媒老闆淫賤黎暨一眾幕後搞手至今仍然逍遙法外；至於淫賤黎涉嫌利用政治捐款操控反對派政客嘅黑金醜聞，亦係查嚟查去得個吉。淫媒有人照住，難怪有恃無恐喇。
法律面前人人平等係假嘅，淫媒更加平等就真，呢個問題一日唔解決，講咩撥亂反正都係吹水嘅咋，叮！
