政壇：搞搞政：運電油入立會斷正 郭家麒死撐唔認錯

反咬行管會洩私隱

郭家麒話未收到行管會封警告信，話其職員無意帶易燃物品進入大樓，只係因為要測試新嘅發電機，所以先帶咗電油入內，無諗過會影響安全喎。講嚟講去，佢都係死撐，唔認有錯，亦無就事件道歉，仲「惡人先告狀」，批評行管會公開閉路電視錄影截圖，唔肯承認、又唔肯道歉，係不負責任同侵犯私隱喎。

據理解，依家未有行管會成員承認洩漏閉路電視錄影截圖。行管會就話呢啲資料都要保密，唔可以隨便公開，提醒議員如果外洩資料嘅話，都要負上責任。不過，有建制派議員認為呢啲資料涉及公眾利益，唔應該隱瞞。亦有議員話應該一筆還一筆，認為郭家麒犯錯就要企定認錯兼道歉。記得白鴿黨議員胡志偉舊年底亦試過喺大樓內開動燃油發電機，釋出陣陣濃烈臭味，被誤以為發生火警，但當時佢亦係道歉都無句，加上今次事件，泛民十足攞正牌做違規事情。

另外，工黨議員張超雄亦去信行管會，話之前審議政改方案期間，立會發出黃色警示，阻礙議員入議會嘅權利。但立會法律顧問反駁話當時所有人都要接受安檢，包括議員同官員，咁樣並冇阻到議員開唔到會，只係造成少少不便啫！佢又話如果緊急時，例如投票鐘聲響起，就會畀議員先入會議廳，再返回補做安檢，並非完全不合理限制，相信唔會違反《立法會（權力及特權）條例》。