港交所尋日慶祝十五歲生辰，剛獲續約嘅行政總裁李小加自然人逢喜事精神爽，喺周年誌慶酒會一眾賓客中，小加尋日不但gel靚個頭，出動到自家至愛嘅紅色領呔沖喜之餘，仲好親切咁同一眾靚女fans握手、自拍selfie，有在場人士話見到小加心情咁靚，以為「深港通」就快宣布。

小加（左三）繫上紅色斑馬呔與在場人士開心拍照。

紅色斑馬呔

究竟小加有幾多條紅色領呔？呢條問題港交所中人都無人答得出，只係話唔止一條，當然，小加嘅衣着品味一向都好一致o架，喺今年二月就試過打「羊仔玩波波」圖案領呔襯番羊年，今次就係斑馬圖案，唔知有乜嘢寓意？佢就話自己都冇留意到條呔係咩圖案，「幸虧不是bear（熊），係bear就麻煩啦。」

問佢平時去開邊度買衫？佢就冇正面回應，只係腼腆一笑咁話，「我自己唔喜歡買衣服。」

係嘅，小加事務纏身貴人事忙，都好難抽到時間買衫，但係如果小加有形象設計師，應該唔使絞盡腦汁日日諗新look，買定熊仔圖案以外，唔同動物圖案嘅紅色領呔無限loop，就可以交足功課啦！

第一手消息請下載on.cc東網iPhone/iPad/Android/Windows Phone Apps