政府修訂提交立法會財務委員會嘅議程，包括公務員加薪在內十一項民生撥款申請先行，之後才討論創新及科技局嘅撥款申請。公務員事務局局長鄧國威尋日出席立法會公務員及資助機構員工事務委員會會議解畫，話雖然今年公務員嘅薪酬調整幅度與薪酬趨勢淨值指標唔同，但仍合乎機制，係行政會議考慮各項因素作出嘅決定，當中嘅考慮包括今年嘅淨指標較綜合物價指數低、公務員團隊士氣問題，同埋未來面對嘅工作困難同挑戰等。

鄧國威希望財委會能夠喺本月內批出加薪嘅撥款，又重申今年加薪幅度建議偏離淨指標並非先例，係每年嘅獨立決定，冇規定下年嘅建議加薪幅度仍然會高於淨指標。

行政長官會同行政會議早前決定公務員嘅薪酬調整幅度，高級公務員加薪百分之三點九六，中低級公務員則係百分之四點六二，加幅高於作為調薪重要參考嘅薪酬趨勢淨指標，三個級別嘅公務員均獲額外加薪百分之零點五。

第一手消息請下載on.cc東網iPhone/iPad/Android/Windows Phone Apps