政壇：又一村區選 左右翼對決

李梓敬當選機會增

之不過，有人漏夜趕科場，亦有人辭官歸故里，好似深水埗又一村呢個傳統中產選區，本來應該幾有睇頭。富貴黨李梓敬空降該區挑戰經民聯現任區議員郭振華，本來仲有社民連新丁周嘉發加入混戰，但據聞郭振華已決定棄選，變相令李梓敬當選機會大增。但係人哋交波，李梓敬係咪接到都未知㗎？

舊年政圈傳出李梓敬空降又一村選區，雖然佢頻頻落區做嘢，但係形勢不被看好，因為郭振華喺又一村扎根多年，加上郭又係深水埗區議會主席，呢個位不容有失，照計選情應該幾穩陣。

不過，政治形勢永遠係千變萬化，最近有線報就話郭振華已決定唔選區議會，真正退出政壇，聽講呢個決定連所屬政團都知悉。

我哋問過郭振華，佢承認考慮緊退休，而呢個諗法喺過去幾年都諗咗好耐，唔係一時三刻嘅決定，更加唔關選舉勝算嘅事。

但係人哋交波，李梓敬又係咪接到呢？事關無咗郭振華呢位現任對手，亦唔代表李梓敬可以自動當選，因為社民連決定派出新人周嘉發狙擊李梓敬，令呢場區選由中產之爭變成左翼（社民連）同右翼（富貴黨）大決鬥。到底鹿死誰手，過多幾個月就知。