爭拗不斷百業難 豈止韓店生意差

嗱，惡疫導致人命傷亡係人都知，但經濟損失一樣咁襟計o架。疫情發展至今，世界各地已經有超過十萬名旅客取消訪韓行程，南韓當局估計，今年旅遊業收入有可能減少九億美元，問你怕未。

又難怪嘅，人同此心，心同此理，疫情來勢洶洶，係人都怕怕啦。本報記者問過唔少本港嘅南韓服裝店負責人，佢哋異口同聲大嘆生意難做，有人去南韓入貨嘅行程都要被迫取消，以致出現新貨荒；有人更因為補唔到貨，要退款畀客人，生意大跌一至兩成。韓式食店情況亦唔好得去邊，有店主大呻生意跌咗一半，真係一殼眼淚。

話時話，香港營商環境每況愈下，唔少韓店本來已經慘淡經營，今次疫情更係雪上加霜，隨時要吊鹽水嘅咋。正如零售業界人士話齋，本港韓店面對入貨成本增加同租金高企雙重夾擊，如果疫情持續，分分鐘出現裁員潮。'

講開又講，今日香港地產獨大，租魔肆虐，受影響嘅又點止韓店吖。大家有眼見，傳統小店買少見少，摺完一間又一間，反而金舖、藥房、化妝品等連鎖店開到成行成市，搞到成個香港千篇一律，冇晒特色，呢啲咪就係高地價、高樓價、高租金「三高政策」下嘅畸形現象囉。

當然喇，家陣百業艱難，除咗因為租金高企，營商成本上漲，更加因為社會泛政治化，日日嘈喧巴閉，雞犬不寧，市民唔可能安居樂業，商戶又點可能有運行吖。特別係嗰班激進分子，一時佔領，一時鳩嗚，一時驅蝗，一時光復，依家甚至自製炸彈添，搞到烏煙瘴氣，七國咁亂。動感之都變動亂之都，好客之都變趕客之都，旅客走夾唔抖，唔怪得零售數字跌完又跌喇。

正所謂，家和萬事興，家衰口不停。做生意講究和氣生財，香港地戾氣愈來愈重，怨氣愈來愈深，生財就冇嘞，倒米就有份。

點都好喇，政改爭拗已經告一段落，樂得耳根清淨，大家係時候收拾心情，重新上路，專心發展經濟搞好民生嘞。畢竟時間唔等人，香港已經蹉跎太多歲月，浪費太多機會，繼續內鬥內耗，最終只有死路一條嘅咋，叮！