政壇：搞搞政：市民厭政爭 戴耀廷被摑醒
立法會否決政改方案，特首梁振英已表明在餘下任期會擺低政改爭拗，唔會重啟，只會集中精力處理經濟同民生，但去年發起佔領行動嘅「佔領中環」搞手戴耀廷就繼續一廂情願，話對香港能夠有民主感到樂觀，但就畀佢嘅港大法律系同事兼基本法委員會委員陳弘毅兜頭扑錘，陳教授話現有政制喺可見將來可能係終極不變，死心未？
設計圖片及對白
「八三一」不變 政改難得共識
戴耀廷尋日出席電台節目時，繼續發開口夢，佢話，佔領行動期間見到有走出來嘅青年人、堅持唔放棄嘅老人家等，佢覺得港人已經政治醒覺。仲話，喺等候下一次政改契機來臨之前，最重要係諗方法，重新建立能夠將各民主力量聯繫嘅橋樑，同培養港人有自主自決嘅管治能力喎。
陳弘毅嘅睇法就悲觀得多，佢認為政改被否決之後，民主發展主要視乎市民喺明年立法會選舉嘅選擇。如果人大「八三一」決定同中央對港政策都唔變嘅話，政改日後同樣係難以得到共識，政改喺立法會依然係得唔到三分之二議員支持，現有政制喺可見嘅將來，可能都係維持不變。佢又認為，經歷兩、三年嘅政改過程後，市民都好厭倦喇，希望立法會能夠正常運作，而政府喺餘下任期，亦應該集中處理經濟民生，相信此舉會得到市民支持。
