政壇：夏千福睇龍舟賽避談政改
落區做騷仲多過返工嘅「小八國聯軍首領」、美國駐港總領事夏千福，尋日趁端午節出動，今次佢輕裝上陣，出席赤柱國際龍舟錦標賽。夏千福話上任兩年，親身睇龍舟競渡都係第一次，仲大晒廣東話親民，但講起香港政改被否決，泛民主派應否再同港府就政改溝通，夏千福就封口唔敢講太多，只話相信泛民自有決定，美方已表態支持落實普選，佢個人冇補充，只係想享受賽事同食糉喎。
夏千福寧願晒廣東話，都唔敢講政改。
夏千福唔敢講政改可理解，事關老美講明下周會舉行新一輪中美戰略與經濟對話，香港民主發展係議題之一，夏千福當然要聽候最高指令啦，萬一亂噏壞咗大事，點擔當得起。雖然夏千福唔敢講政改，但就狂晒半鹹淡廣東話親民，好似講吓「未食五月糉，寒衣勿收籠」俚語，祝大家「歡度端陽」，仲問游咗「燶周衰」（龍舟水）未添，但佢自己就唔落水囉。
