尋日係有紀錄以來最炎熱嘅端午節，參加龍舟挑戰賽嘅隊伍較往年更辛苦，中華廠商聯合會（廠商會）一班青委會成員今年落力打拚，結果打破輸咗三年嘅宿命，以半秒之差力壓對手奪冠，今次仲喺男女混合銅碟賽中奪冠，賽後一眾隊員興奮到互淋香檳！

廠商會青委喺頒獎禮上開香檳慶祝，盡顯興奮之情。

點解佢哋咁興奮呢？原來去年佢哋已經諗住攞個獎作為廠商會成立八十周年嘅賀禮，點知就失落咗，今年呢份就被視為補送嘅賀壽禮物。

廠商會兩名副會長吳永嘉（Jimmy）及徐晉暉（Marvin）亦有撐場，佢哋大讚青委鍥而不捨嘅精神，見證咗多年努力嘅成果，希望大家以後更加團結。為咗答謝青委嘅努力，尋晚二人仲出錢搞慶功宴添。

第一手消息請下載on.cc東網iPhone/iPad/Android/Windows Phone Apps