政壇：創科局未開 楊偉雄熱定身
原本敲定周五第三度向立法會財務委員會闖關嘅創新及科技局（創科局）撥款申請，前日突然「被讓路」予十一項民生項目，原本諗住趕及立法會下月休會前，可以成立嘅創科局再現阻滯，開局又再遙遙無期。「疑似」局長楊偉雄雖然獲政府委任為行政會議成員及特首創新及科技顧問「做住先」，但據聞佢已經開始四出做嘢，仲好似攞正局長牌咁，同立法會議員見面添，不過，楊偉雄似乎唔多熟官場，但熱定身都好，費事第日做局長先嚟撞板吖嘛。
設計圖片及對白
自由黨鍾國斌（Felix）上月底爆料話，楊偉雄搵過佢哋傾偈，仲表明自己唔係「梁粉」，佢當時都提醒楊偉雄，要搵吓唔同黨派傾偈。話口未完，楊偉雄喺力撐創科局嘅資訊科技及廣播事務委員會主席葛珮帆（EQ）牽線下，已經即時逐個約見泛民主派議員，想提早同佢哋打聲招呼，熟悉吓對方脾性及釋除開局疑慮，日後有咩都可以坐低慢慢傾。
已見12人 反應正面
據知，除咗個別議員回覆唔使見，楊偉雄已經密密見咗十二人，六個仲排緊隊。不過，我哋聽聞楊偉雄唔係政界出身，對香港選舉制度未係好熟悉，連地區直選同功能界別議員都未完全分得清楚，因此會面前都要做定功課，了解對方關心咩科技議題，以免會面時「搭錯線」，好彩唔少泛民議員同楊偉雄會面後，反應都幾正面。
雖然楊偉雄比唔少政治委任官員好彩得多，進入熱廚房前，大把時間做定熱身，但創科局撥款申請於三年內兩度胎死腹中，未面世已咁大爭議，想湊大創科局，楊偉雄除咗要過泛民呢關，相信仲有好多難關。
