雖無血緣錫到燶 寄養爸爸賺到笑
【記者劉敏報道】「如果有一日重逢，佢哋仲識嗌我『爸爸』咪當賺咗！」寄養爸爸葉志波十七年前本着助人精神，先後接過多名無血緣關係的小朋友到家中暫住，連同自己兩名親生仔，至今已是八名「仔女」的父親。不過由於寄養制度所限，「爸爸」至今已與四名「仔女」講拜拜，將他們送還到親生父母身邊，雖然每次道別都會眼濕濕，但這位「多仔公」自覺賺盡溫暖時光，冀日後可照顧更多有需要的小朋友，一直賺下去。
葉氏夫婦與兩名親生仔（左一及右一）早已視力力及默默為一家人。
力力（左）送上自製的父親節卡，令葉志波甜到入心。
葉志波親自餵默默吃東西，盡顯父愛。
本港有不少小朋友因各種原因而未能獲親生父母照顧，較幸運的就可獲安排到寄養家庭暫住。本身是普通打工仔的葉志波，一九九五年起因憐惜不幸的小朋友，便無私地肩負起寄養爸爸的責任，每天用公餘時間替「仔女」換尿片、餵奶、陪做功課，而與四名已「離巢」的「仔女」相處日子有長有短，最短七個月，最長達十年。
「囝囝」發燒忐忑不安
「我仲記得o架！Dicky住咗四年，佢人仔細細勁大食，三歲就可以食晒成份早餐；欣欣住咗十年，佢有自閉症，但玩砌圖好叻；奇奇咪成日扭計唔食飯囉，仲有翠怡係十一月二十五號生日！」葉直言對每位「仔女」都錫到燶，經常玩互錫面頰，現時仍會靠睇合照回憶昔日的美好時光。
一向跟「仔女」相處融洽的他，近年再透過香港國際社會服務社接過花名為「力力」及「默默」的男童返屋企，由於七歲的「力力」有學習困難且體質較弱，葉需加倍花心機照顧他，試過一次「力力」發燒久久不退，便令葉忐忑不安，「當日返工無晒心機，淨係記得不停問太太佢退燒未，又特登向公司要求請假陪覆診，老實講，我對親生仔都無咁好！」悉心栽培有回報，葉笑言上月「風水輪流轉」，輪到自己發燒不適，沒料到「力力」竟然主動傳短訊叮囑保重身體，「個心甜晒，返到屋企即刻錫佢！」
適逢父親節，「力力」送上自製的心意卡給葉志波並說：「多謝爸爸，我想學你做一個努力嘅人！」聽罷葉即伸手攬實「乖仔」並笑道：「乖囉！最緊要唔好學壞，至於我係咪值得學習呢？就係一個問號喇！」
