政客收錢獲放生 立會包庇犯眾怒
立法會有名你叫垃圾會，一啲都冇講錯。嗱，壹傳媒集團老闆淫賤黎向泛民政黨及人士秘密捐款逾四千萬元，其中五名收錢嘅立法會議員涉嫌從未申報利益，立法會查咗成年，結果喺眾目睽睽之下表演「捉放曹」醜劇，吹脹！
即係咁，立法會議員個人利益監察會早前決定立案調查其中兩名議員工黨李卓人同社民連梁國雄，但公民黨梁家傑同毛孟靜雙雙「過骨」，議監會尋日宣布「放生」埋民主黨涂謹申。明明五人捲入醜聞，連淫賤黎本人都承認確有其事，立法會居然只調查其中二人而放生另外三人，查案變包庇，仲有天理嘅！
淫媒大亨泵水亂港，無良政客收錢做嘢，係人都知有問題喇，立法會做場大龍鳳敷衍市民，玩放生係意料之中。議監會主席話，針對涂謹申收受捐款投訴成唔成立，由於意見分歧要表決喎，結果三票贊成，三票反對，根據《議事規則》，主席須投反對票，由於冇結論，決定唔再跟進。
唔好扮嘢嘞。表面睇依足規矩，其實睇吓議監會嘅組成，就知搵笨喇！參與表決嘅議員，三個屬建制，三個屬泛民，半斤對八両，勢均力敵。泛民政客至叻「綑綁投票」，只問立場，不問是非，調查自己友，梗係投反對票喇。政黨利益凌駕公義，試問市民點可能知道真相？點可能懲罰受人錢財替人消災嘅失德議員？又如何揪出幕後金主吖！
仲有吖，涂謹申否認收受淫賤黎捐款「理據」係，有關款項係「捐」畀白鴿黨嘅，仲出示該黨信件「證明」身家「清白」，但又拒絕同金主對質，係咪心中有鬼，三歲細路都知喇。咁都畀佢「甩身」，除咗盟友打掩護，亦因現行法例存在嚴重漏洞，幕後金主只要先捐款畀候選人所屬政黨，再由政黨轉交畀指定候選人，就可以隱藏自己身份，款項流轉過程亦神不知鬼不覺。靠呢招「明修棧道，暗度陳倉」，幕後老闆可以喺議事堂安插任自己操縱嘅代言人，呢啲咪係黑金政治囉。
講真，立法會擺明係虛應故事，對剩低嗰兩個收錢議員嘅調查，睇怕都會係咁意走過場就算。話時話，秘密捐款個案廉署已經介入調查，早前到淫賤黎屋企搜證，仲請佢飲「咖啡」，但之後就泥牛入海，唔通又係不了了之？如果廉署都放軟手腳，香港將永無寧日，咪畀太一叮批中吖，叮！
