城中鏡：邱子傑兒子年幼學從商

生意講究傳承，近年喺眼鏡王國大力發展嘅邱子傑，尋日旗下公司又有活動，太太帶埋一對子女齊現身。雖然邱子傑嘅囝囝只有十五歲，但已被爸爸早早灌輸生意經，依家仲開始對從商有興趣，亦會落舖學習，放假更會向爸爸學習生意之道，似乎有意繼承眼鏡王國喎。

邱子傑（左一）早早啟蒙囝囝（左二）嘅生意知識，太太就希望兒子先專注學業。

對於囝囝咁早鍾意生意嘅嘢，媽咪邱李茂琪就希望佢首先專注學業，呢個暑假亦為囝囝安排咗一系列活動，亦有安排補習，遲啲仲會一家人坐船去歐洲旅行，總之就係有學習、有玩樂喇。

不過，做爸爸嘅就緊張搵錢大計，佢話依家開始向囝囝灌輸生意知識，係想等佢知道搵錢辛苦，而囝囝已經透露對巴塞爾錶展有興趣，計劃假期去體驗吓。