城中鏡：阮偉文搞藝術感染囝囝

家長對子女嘅影響係言傳身教，法國五月董事會主席阮偉文（Andrew）就係一例。佢近年瞓身幫手推動法國藝術，本身又鍾意藝術，有唔少收藏，結果，囝囝都有藝術細胞，細個就鍾意畫畫。依家每年暑假，呢個爸爸都會帶囝囝去歐洲博物館，又睇吓當地嘅建築物，培養佢嘅美感。

阮偉文鍾意藝術，囝囝耳濡目染下，都好鍾意畫畫。

講到收藏，Andrew話唔只藝術品：「去旅行見到特別嘢都會買」，佢鍾意手工幼細嘅物品，物料如象牙、珊瑚都係心頭好，但佢笑言：「不過依家好貴買唔起，之前買落相信依家都升值。」

近年佢一直幫手推動法國文化及藝術，原來係早年佢返港時，覺得本港文化藝術生活缺乏，佢又對呢方面有興趣，就一拍即合。