政壇：搞搞政：黃成智撐袋住先 白鴿黨大鍘伺候
民主黨（白鴿黨）前立法會議員、前中委黃成智因為同黨唱反調，搞到黨中委會即刻凍結佢黨籍，據聞該黨紀律委員會（紀委會）前晚決定「判死刑」，決定革除佢黨籍，如果成事，成智就係首名前議員被革除。話時話，○四年白鴿黨內被公安以嫖妓罪名拘捕嘅前黨員何偉途、一一年被揭發於尖沙咀香檳大廈涉嫌嫖妓嘅該黨前總幹事兼前九龍城區議員陳家偉，都未使紀委會革除黨籍，只係兩人自行退黨，黃成智只係不同政見，就畀民主黨大鍘伺候，試問咁叫民主咩？
（設計圖片及對白）
AV仁許智峯向紀委會投訴
成智係白鴿黨前身匯點成員，四月佢以個人名義發起聯署，呼籲若提名委員會嘅公司票轉為個人票，以及撐有「白票守尾門」，泛民議員亦應該「袋住先」支持政改方案，之後佢仲登報希望市民聯署。結果畀該黨老鴿「AV仁」何俊仁及乳鴿許智峯向紀委會投訴，紀委會前晚決定，革除成智嘅黨籍，雖然紀委會主席麥海華話唔可以透露原因，但據知係同成智發起聯署，被指違反黨紀有關喎。
白鴿黨主席劉慧卿話，紀委會已經將報告交畀中委會，今晚會開中委會討論事件，預計兩星期後先會表決，屆時六成中委、即十七人支持就會通過，又坦言中委會未試過推翻紀委會決定，即係成智勢必被革除黨籍。成智對於白鴿黨擬開除的處分按兵不動，只係回應話：「畀少少空間我」，又唔回應係咪會上訴。
