政壇：項明生唔怕輻射 挺日本東北旅遊
日本福島核事故發生超過四年，東北旅遊業仍然一蹶不振。旅遊作家項明生（James）月前身先士卒，唔怕吸輻射，花咗一星期遊遍宮城、福島及岩手縣，入住福島一個農民家庭，品嘗當地人種植嘅米飯團。James話，睇見當地唔少靠旅遊業為生嘅家庭「拍烏蠅」幾年，好感慨。
項明生無懼輻射遊日本東北一星期，更踩單車四圍賞櫻花。
勇闖輻射區回來，James尋日以仙台國際旅遊宣傳大使身份，約班傳媒朋友食飯。佢笑言百毒不侵，遊訪東北時，只着上恤衫、牛仔褲，並無預備任何防輻射裝備。時值櫻花盛開季節，隨手拎起相機拍拍路邊風景，都是一片花海。盛傳核放射物質會流入海洋，污染海產，James就膽粗粗，照食仙台吞拿魚、赤貝及燒牛肉，仲品嘗福島附近牧場出產嘅櫻花雪糕。
James話，日本東北居民喺地震後已回復正常生活，遊當地嘅中國旅客都逐漸增多，偏偏香港人仍然唔敢去，所以將此行所見所聞結集成書，又重點介紹當地民宿，希望大家對日本東北改觀喎。
