政壇：李浩然人生 離唔開港大
香港大學尋日向六十多位服務年資屆十五年或以上嘅教職員頒發長期服務獎，能夠喺港大長期服務，期間肯定有好多難忘嘅經歷。其中建築文物保護課程學部主任李浩然，佢自九八年喺港大取得建築學博士學位之後，繼而於二○○○年喺港大成立「建築文物保護」碩士課程。由於課程太過冷門，佢被人質疑課程畢業生究竟有無出路，又有人嘲諷「阿媽嚟報讀都會取錄」。
任教於港大嘅李浩然（右），其太太李達詩（左）亦係港大教職員。
不過，自遷拆天星及皇后碼頭一役，港人對於文物保育嘅意識大增，以致近幾年都有過百人報讀有關課程，而好多畢業生都覓得相關嘅工作。李浩然又透露，佢同港大檔案中心總監李達詩情投意合，結果拍拖一年就娶之為妻，所以佢嘅學業、事業同婚姻都離唔開港大。
至於另一位服務年期超過三十五年嘅校園生活總監鄧喜添，喺七八年港大畢業之後，隨即受僱於港大，負責處理學生事務工作。鄧喜添話，三、四十年前嘅大學生，其實都好「奀皮」，例如當時嘅迎新活動就玩到通宵達旦，聲浪擾人驚動警察上門，又試過有人將路牌「順手牽羊」掛喺宿舍作裝飾品。
