立法會大樓多次被示威者衝擊，先後推出多項辣招加強保安，包括限制訪客只可到訪指定樓層。但尋日民建聯（建仔）議員葛珮帆（EQ）喺六樓嘅議員辦事處，卻被人闖入，領頭者仲係同為議員嘅新民主同盟范國威。范公然利用職權方便，率領學生擅闖，佢嘅做法認真離譜，議會中人都鬧爆，更對立法會保安信心動搖，尤其下周政改就要表決喇。

（設計圖片及對白）

范國威（右）接完中大學生嘅政改論壇邀請信後，仲帶學生上葛珮帆辦公室踩場。

中大學生組織「中大諗！」幾個成員尋日到立法會外示威，要求身兼中大校董嘅葛珮帆、飲食界張宇人同范國威下周一去中大同學生就政改交流意見，張宇人一早以事忙為由拒絕出席論壇同接信，葛珮帆就一直冇回覆。其後，范國威就利用佢能夠出入大樓各樓層嘅權限，帶埋七個學生闖進葛嘅辦事處，要求佢親自接信同出席論壇，之後再上多兩層搵埋已話唔去嘅張宇人！

死撐冇衝擊

期間，建仔嘅鍾樹根同何俊賢同范國威撞到正，樹根事後鬧爆范係籠裏雞，話辦事處女職員無端端畀陌生男子圍住好驚恐，擔心下周政改方案表決，示威者會對佢哋人身安全構成威脅。高佬賢批評，范國威出於咩動機，都唔應該以違規行為達成，否則下次帶汽油彈都得啦！范國威承認係違規，但死撐啲學生冇叫口號，亦冇「衝擊」。立法會秘書處就話，會向Gary發警告信，會於下周一特別行政管理委員會會議上，向委員請示係咪要再跟進。

立法會泛民議員濫用職權嘅事件真係多不勝數，有議員容許示威者上樓沖涼兼借宿一宵，又當議員辦事處係迷你倉儲存物資，連載有燃油嘅發電機、熱水都要偷運，咁多籠裏雞，大樓想太平都難。

第一手消息請下載on.cc東網iPhone/iPad/Android/Windows Phone Apps