城中鏡：洪丕正自稱逆流三文魚

渣打銀行大中華地區CEO洪丕正（Ben）有深厚嘅加拿大背景，近日佢去咗多倫多，出席貿發局嘅論壇，佢形容自己好似返咗家鄉咁。佢仲話，自己其實係條三文魚，九十年代由加拿大逆流游去大中華。點解係三文魚﹖因為三文魚最特別之處，係逆流而上囉。

洪丕正事業有成，重回加拿大出席貿發局舉辦嘅論壇。

阿Ben係多倫多大學讀碩士，畢業之後就留喺加拿大做嘢，直到九二年，當時中國經濟仲未咁開放，但阿Ben好睇好大中華，覺得未來有好大發展空間，於是決定離開個熟悉嘅舒服區域，千里迢迢回流，用佢嘅說話，即係「游」番香港，加入咗渣打。

結果？依家做咗渣打大中華區嘅一哥，當年睇好大中華區果然有眼光。

阿Ben席上又同啲嘉賓大講當年讀書時嘅冰上曲棍球名星，又推介景點尼加拉瓜大瀑布。