政壇：搞搞政：政改否決日論港股華峰撈底健波拒玩
政改表決臨近，政界中人不但睇淡政改，連股市都睇淡埋，縱橫金融界多年嘅立法會金融服務界議員張華峰（肥老闆）話，預計政改方案被否決當日，港股一定會跌唔少，但政治因素只會有陣痛，跌勢最多持續三日，所以有信心又有能力之人，可以考慮喺低位撈貨。不過，有「立法會股神」稱號嘅保險界議員陳健波就認為，股市可能全面下挫，主張「Cash is king」手執現金嘅策略。
設計圖片及對白
撈貨目標港交所
肥老闆話，力推嘅撈貨目標又係港交所（388），佢話自己唔會呃大家，因為要有人想拋貨求售，都要有人承接至可以成交，而且港交所跌番去低位已經無乜可能，建議大家可以等到二百八十幾蚊水平，就可以小注怡情玩番幾手喎。
陳健波就話，政改方案一旦否決，即係香港未來都會處於動盪時代，而股市係最易受到政局影響，預計港股要幾星期至可以平穩番，所以近期佢都無乜貨在手。佢哋各有睇法，小股民都係自己睇真啲最好。
