政壇：馬逢國怨功能界劃分亂龍
立法會法案委員會尋日開會討論《2015選舉法例（雜項修訂）條例草案》，體育、演藝、文化及出版界功能界別議員馬逢國就代表業界團體表達意見，佢話「香港印刷業商會」過去咁多次選舉都被撥入成為保險界選民，明明保險界同印刷業係風馬牛不相及，好想加入成為出版界選民，但政府偏偏唔肯。
馬逢國尋日代表業界發炮，認為功能界別劃界有問題。
政府就解釋，香港印刷業商會係認可保險承保人，之前曾經為其僱員承保勞工保險，所以被歸入保險界。雖然佢哋好想加入出版界，但保險界係特別功能界別，人數比較少，如果香港印刷業商會符合兩個界別要求，就會被優先納入保險界。
馬逢國話，商會除咗做保險，都做好多出版業務，「你唔好話佢印過本書講娛樂就係娛樂界」，直斥政府回應唔合理。佢又話，功能界別成日被人話無合理性同代表性，今次政府為對手整咗好多子彈，做法係不能接受，更加令功能界別無足夠嘅說服力，大嘆對功能界別造成好大損害。
