政壇：張劍慧率隊 開小米之家
內地手機品牌小米來勢洶洶，尋日在港開設首間「小米之家」（mi home），選址旺角呢個潮人之地，當然係想吸引更多粉絲，即佢哋口中嘅米粉。
張劍慧（中）率隊來港設立「小米之家」，佢話呢個小米之家一間貴過內地的十九間。
呢間小米之家，亦係內地以外嘅第一個海外「小米之家」，佔地二千四百呎，唔算好大，小米網售後部總經理張劍慧透露，呢個小米之家嘅投資額貴過晒內地嗰十九間，下個月，佢哋就會喺台北開新嘅「小米之家」。今次香港呢間至貴「小米之家」唔見小米創辦人「雷布斯」雷軍現身，據講，雷教主都想嚟，但小米今日喺北京有個發布會，所以嚟唔到。
今次「小米之家」開喺旺角樓上舖，張劍慧解釋，係要畀用戶體驗，而唔係着重銷售。
