政壇：求助瞞實情嫻姐叫屈

自從懷仔自願遣返內地後，周婆婆就連珠炮發批評嫻姐，又話佢誤導，又話好後悔搵佢幫手，嫻姐一直唔肯現身對質，結果同屬工聯會嘅兩名議員黃國健同鄧家彪就畀人追問事件，代為擋駕，件事繼續發酵落去，一個版本、一方捱打嘅情況好難改變。或者係咁，潛水幾日嘅嫻姐尋日朝早終於現身立法會，對事件同指控作少少回應。嫻姐解釋，決定自願遣返係周婆婆嘅意願，佢本人同助理都無動機誤導周婆婆，一切都喺陽光下進行，講到呢度，佢仲神情低落、面色凝重咁話，事件令佢感到委屈。

盼求助者講實情

但件事備受關注，同嫻姐最初主動協助兩婆孫，甚至帶兩人一齊高調開記者會有關，點知事後求助人嘅背景同背後嘅故事咁多，而周婆婆又一口咬定被誤導呢。嫻姐話，佢一向以來處理每個求助個案時，都係由對方作出所有決定，自己只係從旁協助幫忙，仲話係周婆婆話有人半夜敲門，同懷仔都好驚，先決定自願遣返。

打滾政界多年，嫻姐話只要係啱就會去做，任何求助個案都會盡力幫手，但未必每宗個案結果都能令對方滿意，希望求助嘅人要講出實情，否則好難幫到手。點都好，呢次事件對求助者、政界人士都係一個教訓，事後指摘講乜都太遲。