創新科技無寸進 高官最叻得把口
港府高官熱衷隱身做「鍵盤戰士」，財政司司長曾俊華係其中表表者。嗱，佢又發表網誌嘞，今次提到香港人口老化，建議採用更多高新科技，提高工作效率喎。其實，阿媽係女人嘅道理邊個唔識講吖，問題係港府施政無能，講乜都係嘥氣嘅啫。
嗱，曾俊華推崇備至嘅工業用機械人，根本唔係新鮮嘢，日本、德國、美國等發達國家早就廣泛應用於重工業，好似豐田汽車咁吖，一早已經有「每六秒生產一台汽車」嘅口號。時至今日，「機器換人」喺中國內地亦漸成潮流，除咗應用於工程領域，傳統勞動密集型企業如石化、糧食、建材、化肥等亦有應用。
香港喺呢方面遠遠落後，原因係長期集中發展金融、地產等四大產業，結構單調，加上土地不足，連住屋問題都無法解決，又點發展工業用機械人呢？曾俊華話喎，網上商店亞馬遜使用輔助機械人後，工人處理貨物嘅效率大大提高，認為香港可以借鏡，甚至有機會吸引製造業回流。講就易咯，家陣香港營商成本高企，試問冇政策配合，無利可圖，點令製造業回流？點吸引商人投資創新科技？
話時話，香港產業結構一成不變，創新科技毫無出路，根本係港府一手造成。當局口口聲聲有推動創新科技嘅決心，點知講嚟講去三幅被，無非係指租用率長期偏低嘅科技園，同埋關卡重重嘅創新科技基金等資助計劃。正如前任港大校長徐立之話齋，港府對資助本地大學發展科研嘅經費少得可憐，連內地一間普通大學都不如，證明港府所謂重視科研，不過係葉公好龍咋。
更大鑊嘅係，社會泛政治化，政客為反而反，連創科局都因為拉布而兩度胎死腹中。雖然港府捲土重來，志在必得咁款，但創科局要成功過財委會一關，未許樂觀。反觀周邊地區都有專責科技產業嘅部門，例如新加坡有國家科技局；台灣有科技部；南韓亦一早有相關嘅高層次部門。香港至今仲係「百冇」，競爭力落後於人又有乜出奇。
講起就激氣，從董建華時代嘅乜港物港，到曾蔭權時代嘅六大優勢產業，再到現屆政府將產業「做多做闊」，全部得個吹字，連影都冇隻。如今連深圳都後來居上，南山區早就取代北京中關村成為中國「硅谷」，香港依然毫無寸進，點會有運行吖，叮！
