城中鏡：賀至親畢業 施榮懷變身飛人
中華廠商聯合會前會長施榮懷（Irons）上月化身空中飛人四圍飛，十二日內分別去咗紐約、華盛頓、芝加哥、多倫多及康涅狄格州等多個唔同地方，參加細姪女Audrey大學畢業禮，以及細仔仲樂嘅高中畢業禮。
施榮懷（左二）出席細仔仲樂（左三）高中畢業禮，施太（中）、細女Charmaine（右三）、細姪女Audrey（右二）同大仔湧樂（右一）齊齊現身。
Irons話，細仔於康涅狄格州高中畢業，八月會到南加州大學繼續升學，而細姪女嘅大學畢業禮就喺華盛頓，由於中間相距十日，所以佢哋趁機去咗其他地方玩吓先，包括佢三十年冇去過嘅多倫多，又順道到位於芝加哥嘅公司走一轉。但其後返港冇幾日，Irons原來又要出門，飛到瑞士日內瓦，出席國際勞工大會，佢自言至今仍未適應時差喎。
