城中鏡：議員避遊日韓
南韓確診中東呼吸綜合症（俗稱新沙士）嘅個案持續上升，好多港人都急急煞停暑假韓遊大計，轉為趁日圓低水，去日本玩番轉。不過多個政界中人就唔係咁睇，寧願去歐美玩，都唔打算去日、韓兩國玩，其中立法會議員梁美芬話，早年韓劇《大長今》熱播後，已經成為韓流粉絲，最鍾意去首爾買衫同飾物，原本今年暑假飛去美國探讀緊書嘅囝囝，都諗住途經南韓轉機，但因新沙士疫情唔係講玩，寧願畀貴啲，坐直航飛機去美國。
葉太（右）同女兒多年來都冇去日本。（資料圖片）
梁美芬寧願畀多啲錢直航飛美國，都唔中途經南韓轉機。
張華峰認為，唔好以為日圓低水就抵去。
多名議員亦對遊日耍手兼擰頭，身兼行政會議成員嘅新民黨葉劉淑儀話，自己對日本無乜喜好，女兒葉榮欣更係好唔鍾意日本，尤其係現任日本首相安倍晉三，認為對方唔敢正視慰安婦問題，所以近幾年兩母女都冇去日本，今年暑假就決定去歐洲坐郵輪。
肥老闆：依家遊日非最抵
曾任旅發局成員嘅民主黨議員單仲偕提醒消費者，唔好以為日圓低水就抵去，因為好多航空公司已經靜雞雞加價對沖，部分旅行社更一早調高日本團費，如果想機票平啲，單仲偕建議大家去東南亞國家，而佢自己今年會選擇去斐濟潛水。
一向係股市「大好友」嘅金融服務界議員張華峰（肥老闆）則認為，日本政府軍費連年增加，歐洲經濟繼續差，預計日圓未來三年都只跌不升，所以呢個時候去日本未算係最抵。當問及暑假出外嘅目的地，肥老闆話，自己寧願去北歐玩，因為當地夠晒環保，值得學習喎。
