政壇：搞搞政：黨員紛自立 撕碎公文袋
泛民政黨內部分裂嚴重，民主黨（白鴿黨）元老張文光前日先慨嘆泛民「碎片化」，遲早變成一盤散沙。佢嘅擔憂，其實又名公文袋嘅公民黨仲犀利，一向同白鴿黨爭緊做泛民大佬嘅公文袋，喺議會得六席，但係當中就有三個議員另起爐灶，搞多一個政治團體或平台，真係離撕裂公文袋不遠了。
設計圖片及對白
郭家麒生「蛋」 湯家驊搞智庫
正所謂黨內無派、千奇百怪，但公文袋黨員出名缺乏黨性，六個議員開會可以有七個意見，仲不時互相明踩暗寸，最近仲紛紛自立門戶對着幹。前日郭家麒率先成立名為「蛋」嘅網上平台，倡議年輕人要認識同了解中國，擺明要同黨友毛孟靜創立嘅「香港本土」打對台。尋日又輪到湯家驊，宣布聯同多名學者，成立名為「民主思路」嘅溫和泛民智庫平台，聲稱想喺現時極端政治對立嘅環境下找到第三條出路，不過，佢哋嘅立場又同公民黨黨魁梁家傑為首嘅激進抗爭路線剛剛相反。
問到若要喺公文袋同新平台之間二擇其一，湯家驊點揀？佢含糊其詞，話唔係好想答，之後又話公文袋係個「多元同自由」嘅政黨，並點名指郭家麒同毛孟靜都有參與其他組織，相信個黨唔會只係針對佢喎。公文袋內檔口多多，但黨高層一直當睇唔到，相比白鴿黨要搬黨紀嚟禁聲，公文袋真係更似無掩雞籠多啲。
