政壇：吳得掂丁蟹上身逆市加分
近日電視劇《大時代》熱播，丁蟹角色被指不時逆市得益，又稱「吳得掂」嘅教育局局長吳克儉，亦疑似政壇丁蟹上身，事關香港研究協會本月初嘅最新民調顯示，以一至五分作為標準，三司十二局官員嘅評分，大部分都係錄得下跌，吳克儉嘅評分係少數逆市上升。
吳克儉喺最新民調嘅評分中，微升零點零一分至二點一七分。（資料圖片）
喺呢次評分當中，吳得掂微升零點零一分至二點一七分，分析指相信同早前免費幼稚園教育委員會最新建議出爐有關，惟吳於十二名問責局長中仍處於低位，僅排名第十一。
至於評分跌得最多嘅係食物及衞生局局長高永文，急跌零點一九分至三點三八分，預料同最近南韓新沙士疫情告急，擔心香港亦都會陷入風險，以及早前落區宣傳政改方案時，同市民作出爭辯，一度拋下一句「講完」等因素有關。
另外，值得一提嘅係，政改方案雖然很大機會被否決，政改三人組嘅評分未見大跌，其中兩人嘅評分維持不變，另有成員更微升零點零一分，認真估佢哋唔到。
