政壇：侯志強自誇正宗本土
有泛民團體揚言於立法會表決政改方案當日包圍立法會示威，有網民於社交網站發貼爆料，指喺上水聽到「侯X強」同個後生仔對話，此人吩咐對方嗰幾日要搵多啲人，到時要扮本土派，並暗指要承認同新民主同盟范國威有關連，雖然網上貼文無指明道姓，但極大機會係指控上水鄉事委員會主席侯志強，侯志強接受查詢時，否認講過呢啲說話，仲話講到本土嘅話，佢認第二，冇人敢認第一咁話喎。
侯志強話講到本土，佢認第二，冇人敢認第一。
對於網民發貼爆料嘅內容，范國威唔理真假，即時發出聲明，譴責建制派多次請人假扮示威者參與遊行示威，趁機搗亂嫁禍。
侯志強接受查詢時，隔空回應指自己冇講過有關言論，直言如果有做過，佢都唔怕認，不過佢就唔會做啲咁無聊嘅事，真係唔知乜人咁睇得起佢喇。
講到本土派，侯志強自爆，佢哋姓侯嘅喺香港已經九百三十八年咁耐，佢認第二，都冇人敢認第一。當問及政改表決日會否到立法會請願，侯志強反問「無端端請乜願」。
