政壇：政改劍指謝偉銓 吳永輝虎視議席
專業團體紛紛發起政改民調，希望立法會業界代表可以參考，甚至跟從結果投票，其中身為規劃師嘅民主黨中常委吳永輝（Stanley），就疑借業界政改民調，夾實現任建築界議員謝偉銓（Tony）「反袋住先」，聲稱業界四個學會政改民調中，三個嘅唔接受政改方案比率都較多，不過Tony隨即反擊話，Stanley搞錯一個民調結果，反批個別人士下判斷前，應該廣聽意見，睇清楚數字。
政改關鍵時刻，吳永輝趁機狙擊業界立法會代表謝偉銓。
謝偉銓
曾以200票之差落敗
其實Stanley已非首次對建築界議席虎視眈眈，於過去十多年更係屢敗屢戰，佢先後於○四年、○八年同一二年連續三屆參選，由○四年只得五百多票，大比數落敗，到一二年時，支持者有所增長，獲得一千四百多票，僅以約二百票之差落敗予Tony，今次高調跟進業界民調結果，似乎暗示或第四度披甲上陣，挑戰建築界議席。
Tony其後發出新聞稿，未有表明會否跟從業界民調嘅結果作出投票，重申在政改方案表決前，會繼續聆聽各方意見，以便作出整體綜合考慮。
