政壇：管浩鳴養乖貓喻內地與港關係

政改爭議不絕，內地同香港嘅關係都受到衝擊，香港聖公會教省秘書長管浩鳴尋日出席電台節目時，講到中港關係，佢就以主人同貓嘅關係來比喻，仲以自己家中飼養嘅貓嚟比喻，話：「我屋企嘅貓就好乖，所以唔需要搵個籠困住佢。」

政策放寬視乎港表現

管浩鳴形容，佢好多朋友都話貓會抓壞啲傢俬，似乎對家中養貓有睇法，不過佢屋企嘅貓就好乖，佢亦唔會搵個籠困住佢哋。管浩鳴比喻之後，又話香港如果想內地對香港嘅政策放寬啲，就要視乎香港嘅表現，佢嘅言下之意，係咪扭計嘅孩子有糖食嘅年代已過去﹖而內地對香港政策嘅鬆緊，好多時都係因為香港嘅表現嚟定呢？

自從政改啟動以來，港人談政改就例子多多，唔係母子關係，就係阿媽幫手揀老婆，依家又有主人與寵物，講嚟講去，又有人批評比喻唔符合內地與香港關係嘅描述，真係得個講字。