政壇：見工揀衣飾有秘訣
踏入六月，大學生紛紛離校，遲啲文憑試放榜，又有一批同學仔會出嚟搵正式工作或搵暑期工，呢個時候，了解吓面試基礎知識，實在好有必要。創辦人出身高盛嘅華爾街專門公司就醒大家幾招，雖然佢哋鎖定目標係想入投行嘅求職者，不過，一般面試者亦可以參考吓，譬如買西裝不一定要貴，但一定要合身，女士服飾唔使因為驚太有女人味，而不敢稍為鮮艷，最重要係頭腦加優雅。
根據佢哋嘅意見，好多男人買西裝會買大啲尺寸，諗住舒服啲。點知原來咁樣已經係第一個錯誤，因為西裝最緊要啱身，若套西裝大咗，就算名貴到值成十萬蚊，都一樣唔及套啱身嘅平嘢。
而且，今時今日，好多彈性布料加埋裁縫技術，已經可以解決問題，千祈唔好大失分寸。而襪都好重要，因為襪嘅顏色係要襯返條褲，而唔係襯對鞋。
至於西裝配乜嘢顏色嘅鞋好？一般人以為黑色最穩陣，但間顧問公司就指出，啡鞋才穩陣，而且啡、白蘭地色、暗紅偏啡都唔會錯。
