政壇：嫻姐匿埋 橫額受靶

家屬反鬧不負責任

懷仔事件因傳媒嘅追查，至今仍未平息，由於受助人家屬返咗內地後，又被揭案中有案，仲有人訴苦，話後悔搵嫻姐幫手，甚至鬧佢不負責任添。嫻姐近日鮮有露面，惟有同屬立法會議員嘅工聯會同事黃國健繼續代佢解畫，話對有關事件嘅指控感到好無辜。

講無辜都唔少得鄧家彪，佢出席福利事務委員會會議時，都畀在場記者追訪，鄧家彪惟有話依家並唔係總結事件嘅時候，相信嫻姐稍後會主動交代詳情咁話。一波未平一波又起，嫻姐懸掛街頭嘅肖像橫額又出事，事關嫻姐同黃國健及工聯會社區幹事梁俊賢喺竹園社區會堂外掛咗一幅橫額，主要係宣傳法定男士侍產假正式實施，但橫額就將「侍產假」寫成「待產假」，一撇之錯，意思卻相去甚遠，男人都要待產，工聯會又畀人笑多劑。

咁都未算，現場所見，合共六幅有嫻姐肖像嘅橫額中，有三幅都畀人鎅爛，而且爛嘅位置仲係嫻姐嘅大頭肖像面部位置添，同一橫額上嘅黃國健同梁俊賢肖像都完好無缺，似乎破壞者專登攞嫻姐嚟發洩咁，唔通又同近日嘅懷仔事件有關，即使佢匿埋，但肖像橫額都不能幸免。