發旅警猶豫不決 港府效婦人之仁

新沙士有幾犀利？截至目前為止，南韓已累積超過五十宗個案，死亡人數節節上升，有新沙士康復者炮轟南韓抗疫落後半個世紀。專家更警告，部分個案屬第三代感染，而且感染人數眾多，社區爆發風險大增。話口未完，真係有疑似患者唔理隔離禁令，偷偷哋去另一條村莊並接觸百幾人，搞到當局要大規模封村，隨時成為香港沙士時淘大花園翻版，都咪話唔得人驚。

古人都有教落，危邦不入，亂邦不居，家陣疫情風頭火勢，港府照計應該對南韓發布旅遊警示，提示市民唔好以身犯險，可惜市民急官府唔急，仲搬世衞出嚟做擋箭牌，話暫時未使發布警示住喎。咁就好笑嘞，世衞建議淨係用嚟參考之嘛，台灣當局咪一早提升對首爾旅遊警示囉，你可以話佢違反世衞建議咩？人命關天，各地政府有權咁做o架。

再講吖，當年香港爆發沙士，世衞夠冇話香港係疫區咯，好多地方咪一樣冇面畀。人哋識得做，港府就效婦人之仁，新沙士殺到埋身，居然繼續按兵不動，只會令市民無所適從，繼續行程又怕中招，退團又怕不獲退款，左右為難。正如「東方報業民意調查」顯示，五成人認為港府應提高旅警級別；兩成九更表示會暫停到南韓旅遊，港府收到未吖？

講番今次疫情，南韓當局一來刻意隱瞞，二來防控措施滯後，以致疫情迅速擴散，自己衰都未算，仲要累埋街坊，隨時累埋鄰國添。當然喇，港府表現都唔好得幾多，早前有南韓患者過境，雖然佢發燒被發現，但最終居然放行不誤，簡直中門大開。雖然當局事後急急補鑊，追蹤同患者有緊密接觸嘅人士，可惜又做啲唔做啲，其中兩名韓裔女乘客一度玩失蹤，好在事後搵得番，但已經嚇到市民一額汗。三成九受訪者狠批當局反應遲緩，警覺性低；三成一批評追蹤機制唔嚴謹，唔係無的放矢o架。

黃台之瓜，何堪再摘。香港曾飽受沙士之苦，何況今日社會因政治化搞到七國咁亂，一個唔好彩再畀疫魔蹂躪，真係玩完都似，叮！