城中鏡：港大校友聚首 憶甜蜜時光
好多人踏入職場後都緬懷昔日嘅校園生活，尋日適逢香港大學於沙田馬場舉辦校友會挑戰盃，唔少港大校友都聚首一堂，維多利亞教育機構總校長孔美琪（Maggie）講到當年事，話佢喺港大讀教育碩士期間，係人生最難忘嘅一段時期，皆因佢喺呢四年內經歷晒結婚、度蜜月、生小朋友等人生大事。
孔美琪於港大讀碩士課程期間經歷多項人生大事。
楊紫芝（中）桃李滿門，梁智鴻（右）及太太梁馮令儀（左）都係佢學生。
李麗娟（左）畢業多年依然心繫港大母校，右為其妹李桂蘭。
Maggie臨盆在即趕功課
Maggie對於當年嘅港大讀書點滴記憶猶新。佢話當年讀碩士期間，經常要趕功課，頭兩年就要趕及結婚同到夏威夷度蜜月前做完，其後佢臨盆在即，並於交功課限期前感到差不多作動，於是發力通宵完成八千字功課，並千叮萬囑老公記得幫佢寄番學校，最終順利分娩兼完成學業。
同場仲有港大前女副校長楊紫芝，佢喺港大任教多年桃李滿門，其學生包括港大校務委員會主席「金刀梁」梁智鴻及其太太、外號「放射科女王」嘅梁馮令儀、以及著名心臟科醫生謝德富等人，不過佢就冇教過現任港大醫學院院長梁卓偉，一齊教書就有喎。楊紫芝其後爆料，當年睇住金刀梁點樣追太太馮令儀返嚟。
民政事務局前常任秘書長「媽打」李麗娟亦係港大校友，佢話雖然畢業多年依然心繫母校，前排仲難得同班港大舊同學一齊為母校新校園籌款，未來亦會於校園內擺設本地雕塑家李展輝（Danny Lee）嘅金屬樹木裝置藝術雕塑，象徵十年樹木，百年樹人。
