政壇：搞搞政：民陣第四度聯署 泛民火滾拒再綁
二○一七年特首普選方案表決已在倒數階段，泛民二十多名議員早前先後三次聯署否決人大常委會「八三一」框架下政改方案，已被批綑綁，但據聞有人覺得唔夠喉，同泛民合作多時、由召集人陳倩瑩領導嘅民間人權陣線早前再提意見，要求泛民議員喺政改表決前夕，第四度聯署否決政改，聽聞泛民代表聽到呢個建議即刻火都嚟，認為咁做即係唔信佢哋，即場已經否決呢個建議。
設計圖片及對白
被譏「歃到血貧」
三次聯署都未夠，仲要再玩第四次，上次聯署否決政改後，政界中人已訕笑泛民議員歃血為盟，歃到血貧，而且每綑綁聯署一次，就愈證明泛民唔團結，難怪啲議員對民陣咁火滾。再者泛民上次聯署前，公民黨湯家驊率先公開唱反調，表明唔會再參與綑綁聯署，據知其實其他泛民都有相同諗法，只係唔敢講出口，費事招人話柄。
泛民議員同民陣嘅合作早見心病，四月下旬，政改方案出爐後，泛民不停落區宣傳「反袋住先」，包括落區搞街站派傳單，又搞巴士、汽車巡遊，甚至組成單車車隊宣傳，但似乎宣傳成效一般，據聞呢啲行動都係民陣發起，泛民負責撐場，但成效存疑，好多泛民中人頗有微言。尋日早上嘅「真落區行動」，聽講更有唔少泛民成員私下都怨聲四起，事關全港九新界分成多條路線發起遊行，有人認為民陣好似玩緊佢哋咁。
